काठमाडौं–राइजिङ्ग स्टार कल्चर ग्रुप, चन्द्रागिरीले आफ्नो आठौं वार्षिकोत्सवको अवसरमा हालै आयोजित वार्षिकोत्सवमा सञ्चार, फिल्म, गीतसंगीत तथा खेलकुद क्षेत्रमा योगदान पुर्‍याएका विभिन्न ब्यक्तिलाई ‘राष्ट्रिय स्रष्टा तथा कलाकार सम्मान’ प्रदान गरेको छ । केटिएम जाम डान्स ब्याटलका बिजेतालाई पुरस्कृत गरिएको कार्यक्रममा चलचित्र पत्रकार लक्ष्मण सुवेदी नगद राशीसहित ‘उत्कृष्ट चलचित्र पत्रकार सम्मान’बाट सम्मानित भए ।

त्यस्तै फिल्म निर्देशक मधुसुदन भट्टराई र कल्याण अधिकारी ‘उत्कृष्ट निर्देशक सम्मान’, गायक सुरज पौडेल र नवीनकुमार पौडेललाई ‘उत्कृष्ट गायक सम्मान’, विद्या तिवारीलाई ‘उत्कृष्ट गायिका’, तुलसीप्रसाद श्रेष्ठ, भुवनकुमार काफ्ले र विकास चापागाईंलाई ‘उत्कृष्ट कलाकार सम्मान’ तथा काजीमान श्रेष्ठ र वीरकृष्ण श्रेष्ठलाई ‘खेलाडी सम्मान’ प्रदान गरिएको थियो ।

उनीहरुलाई बागमती प्रदेशकी सामाजिक विकास मन्त्री कुमारी मोक्तान, चन्द्रागिरी नगरपालिकाका मेयर घनश्याम गिरी, उपमेयर लीसा नकर्मी, चन्द्रागिरी नगरपालिका वडा नं ७ का अध्यक्ष शम्भुकुमार केसी, बागमती प्रदेश सदस्य रमा आलेमगर, कार्यक्रम आयोजक संस्थाका अध्यक्ष विक्रम तामाङले सम्मान गरेका थिए ।