काठमाडौँ- नेकपा माओवादी केन्द्रका अध्यक्ष पुष्पकमल दाहाल प्रचण्डले घनश्याम भुसाल, योगेश भट्टराई, गोकर्ण बिष्टलगायतका १० जनाले केपी ओलीसँग आत्मसमर्पण गरेको टिप्पणी गरेका छन् ।

सोमबार सूर्यनाथ रान यादवको स्मृति दिवसको अवसरमा सोमबार पार्टी कार्यालय पेरिसडाँडामा आयोजित कार्यक्रममा दाहालले भने,’ओली जालीझेली नेता हो भनेर भन्ने घनश्याम, गोकर्ण, योगेशलगायतका १० जना नै हो । तर आफूहरुलाई दह्रोसँग टेक्नुस् भन्नेले नै आत्मसमर्पण गरेको देखेर अनौठो लाग्यो ।’

आफूलाई वैचारिक भन्ने नेताहरुले नै आत्मसमर्पण गर्नु अनौठो भएको उनको भनाइ छ ।

दाहालले आफ्नो पार्टी पनि एमाले जस्तै हुन लागको भन्दै चिन्ता पनि व्यक्त गरे ।

‘हाम्रो पार्टी विस्तार एमालेकरण हुन थाल्यो । एमाले जस्तो–जस्तो, झुट, बेइमानी, जालझेल, भष्ट्राचार, पद जसरी नि प्राप्त गर्ने, गुट नै गुट एमाले भनेको त्यही हो,’ उनले भने । एमालेको विचार, सिद्धान्त सूर्य मात्रै भएको पनि दाबी गरे ।

दाहालले अब क्रान्तिकारीहरु एकजुट हुनुपर्ने बताएका छन् । देशभरी विस्तारै उभार आउने संकेत देखिएको बताएका दाहालले प्रतिगमन कसले परास्त गर्‍यो भन्दा आफूहरुलाई नै जनताले श्रेय दिने दाबी गरे ।

पूर्वमाओवादी एवम् क्रान्तिकारी घटक छिट्टै समीक्षा गरेर एकजुट हुन आवश्यक रहेको उनको भनाइ छ । उनले विप्लव, वैद्य, उपेन्द्र-बाबुराम, मोहनविक्रमहरु एकै ठाउँमा बसेर ऐतिहासिक समीक्षा गर्ने समय आएको धारणा राखे ।

कार्यकर्तामा नभइ नेताहरुमा समस्या भएकाले अहिलेको अवस्था आएको दाहालको धारणा छ । उनले भने, ‘अहिले जनता, कार्यकर्ता बिग्रिएको होइन, नेताले गर्दा बिग्रिएको हो । अरुलाई दोष नलगाई मैले गर्दा बिग्रिएको भनेर अगाडि बढ्दा सफल भइन्छ।’