मोरङ– मोरङको विराटनगर महानगरपालिकाका विभिन्न स्थानमा चोरी गर्ने दुई जना पक्राउ परेका छन् ।

चोरीमा संलग्नलाई प्रहरीले पक्राउ गरी आज सार्वजनिक गरेको हो । पक्राउ पर्नेमा विराटनगर ११ का २९ वर्षीय संजय भन्ने अंगत चौधरी र विराटनगर ६ का ३१ वर्षीय सन्तोष दास रहेका छन् ।

जिल्ला प्रहरी कार्यालय मोरङबाट विशेष प्रहरी परिचालन गरी उनीहरुलाई आफ्नै घरबाट पक्राउ गरिएको प्रहरीले जनाएको छ ।

पक्राउ परेका दासको साथबाट ५५ हजार ७ सय ५० नगद र चौधरीको कोठाबाट कोनिका कम्पनीको टिभी थान-१, कानमा लगाउने झुम्का थान-३, लेड टिभी थान-१, मोबाइल थान-२, फलामे कराई थान-१, फलामे औजार थान-४, चाँदीको सिक्री थान-१ र नेपाली नगद ५ लाख ८ हजार ७ सय ३ सहित पक्राउ गरेको हो ।

प्रहरीले थप अनुसन्धान गर्ने क्रममा गत जेष्ठ ९ गते विराटनगर ११ का विनोद कुमार नुनियाले सञ्चालन गरेको महाविर इलेक्ट्रिक पसलमा भेन्टिलेसन फुटाई नगद ६५ हजार, गत जेष्ठ ११ गते विराटनगर १५ बैंकरोडका समिर लामाको पसलमा राती झ्याल फुटाई नगद ८९ हजार १ सय ४५ र २ वटा मोबाइल, त्यसै गरी गत जेष्ठ १६ गते विराटनगर – ९ महेन्द्रचोकस्थित अनिस रिजालले संचालन गरेको अफिसको ढोका फुटाई धाराको टुटी ७ थान र गत जेष्ठ १५ गते विराटनगर ९ रामजानकी पथका बिरेन्द्र कुमार मण्डलले संचालन गरेको सुनचाँदी पसलमा प्रवेश गरी सुन २४ ग्राम, चाँदीको पूजाको भाडा ३५० ग्राम, नगद रु. १७ हजार र ग्याँस सिलिण्डर थान १ चोरी गरेको खुलेको छ ।