काठमाडौँ– साताको पहिलो दिन आइतबार शेयर बजार ठूलो अंकले घटेको छ । कारोबार शुरु भएको केही मिनेटसम्म उकालो लागेको शेयर कारोबार मापक नेप्से परिसूचकमा बजार बन्दा हुँदा उच्च अंकको गिरावट आएको छ ।

३ हजार माथि पुगेर रेकर्ड बनाएको नेप्से परिसूचक आइतबार २ हजार ९ सय ५ मा रोकिएको छ । नेप्सेमा कारोबार हुने अधिकांश कम्पनीहरुको शेयर मूल्य घटेर बजार समूहगत सबइन्डेक्सहरु सबै राताम्मे देखिएका छन् ।

नेप्से परिसूचक ६३ दशमलव २८ अंकले घटेर २ हजार ९ सय ०५ दशमलब ३२ अंकमा झरेको छ । नेप्से परिसूचक ठूलो अंकले घट्दा कारोबार रकम भने यस अघिको कारोबार भन्दा थोरै सुधारिएको छ । गत बिहीबार ११ अर्ब भन्दा कमको कारोबार भएकोमा आइतबार भने करिब १२ अर्बको कारोबार भएको छ ।

दिनभर भएका १ लाख २८ हजार २ सय ८१ कारोबारबाट २३० कम्पनीको २ करोड ७३ लाख ४४ हजार ५ सय कित्ता शेयर किनबेच भएका छन् ।

जसबाट कारोबार रकम ११ अर्ब ८१ करोड ९४ लाख २८ हजार २ सय ८९ रूपैयाँ पुगेको छ ।