काठमाडौँ– काठमाडौँको सिनामंगलस्थित सुरिया हेल्थ केयरले स्वाब नै नलिइ कोरोना परीक्षणको नेगेटिभ रिपोर्ट दिने गरेको खुलेको छ ।

महानगरी अपराध महाशाखाका अनुसार उक्त ल्याबले ९ हजार रुपैयाँ लिएर परीक्षणविना नै कोरोना नेगेटिभ भएको रिपोर्ट दिने गरेको खुलेको हो ।

महाशाखाको टोलीले उक्त ल्याबमा छापा मारी केही नक्कली रिपोर्ट बरामद गर्नुका साथै संलग्न व्यक्तिलाई नियन्त्रणमा लिएर अनुसन्धान जारी राखेको जनाएको छ ।

प्रहरीले व्यवस्थापन प्रमुख लेखानन्द प्रसाद सिंहसहित ८ जनालाई पक्राउ गरेको छ । यसैगरी उक्त ल्याबका कम्प्युटर लगायतका उपकरण समेत अनुसन्धानका लागि नियन्त्रणमा लिएको प्रहरीले जनाएको छ ।

घटनका विषयमा महाशाखाका प्रहरी उपरीक्षक कृष्ण प्रसाद पंगेनीले भने, ‘जनस्थास्थ्यका हिसाबले यो अत्यन्तै ठूलो लापरबाही हो । ल्याबको मिलेमतोमा नक्कली एजेन्ट खडा गरी ९ हजार रुपैयाँ लिएर स्वाव नै परीक्षण नगरी नेगेटिभ रिपोर्ट तयार भएको हामीले पाएका छौँ । थप अनुसन्धान हुँदैछ ।’

उक्त ल्याबले वैदेशिक रोजगारीमा जानेहरुका लागि समेत गर्नुपर्ने आवश्यक पीसीआर परीक्षण गर्दै आएको खुलेको छ ।

यस्तो छ प्रहरीले जारी गरेको विज्ञप्ति