काठमाडौँ– नेपाली कांग्रेसका केन्द्रीय सदस्य तथा युवा नेता गुरुराज घिमिरेले प्रधानमन्त्रीको कदमले विभिन्न आन्दोलनबाट प्राप्त उपलब्धि गुम्ने खतरा पैदा भएको आरोप लगाएका छन् ।

बीपी कोइराला युवा नेतृत्व विकास मञ्चले शनिबार काठमाडौंमा आयोजना गरेको कार्यक्रममा उनले संसद विघटनको कदमले मुलुक संकटमा परेको र प्राप्त उपलब्धि गुम्ने खतरा पैदा भएको आरोप लगाएका हुन् ।

उनले आन्दोलनमा केपी ओलीको कुनै भूमिका नरहेको र विभिन्न उपलब्धिमा कुनै मोह नभएको आरोप लगाए ।

तत्कालीन अवस्थामा ओलीले मात्र नभएर नेकपाका अन्य नेताहरुका कारण नै गत निर्वाचनमा धेरै भोट आएको भन्दै घमण्ड गर्न नसुहाउने तर्क गरे ।

घिमिरेले ओलीको क्रियाकलाप तानाशाह भन्दा कम नरहेको टिप्पणी गरे । उनले नेपालको राजनीति संघर्षको विन्दुमा प्रवेश गर्न खोजेको भन्दै सचेत रहनुपर्ने जिकिर गरे ।

कार्यक्रममा अन्य नेताहरुले प्रजातन्त्र प्राप्तिका लागि कांग्रेसका अग्रह नेताहरुले खेलेको भूमिकालाई पार्टीले बिर्सन नहुने धारणा राखेका थिए ।