काठमाडौँ-  आज काठमाडौँ उपत्यकाका विभिन्न स्थानमा विद्युत कटौती हुँदैछ ।

मर्मतसम्भारको काम गर्न पर्ने भएकाले आज काठमाडौँ, ललितपुर र भक्तपुरका विभिन्न स्थानमा ठाउँमा आज बत्ती जाने नेपाल विद्युत प्राधिकरणले जनाएको छ ।

लगनखेल वितरण केन्द्र अन्तर्गतका क्षेत्रमा बिहान ११ बजेदेखि तीन घण्टा बत्ती कटौती हुनेछ । रेडियो नेपाल फिडरअन्तर्गत पर्ने सातदोबाटो, रेडियो नेपाल, कृषि अनुसन्धान, इसिमोड, खुमलटार, प्रचण्ड निवास, धापाखेल, भेल्पा, जेम्स, कान्तिपुर इन्जिनियरिङ, नागदहलगायत क्षेत्रमा दिउँसो २ बजे मात्रै बत्ती आउनेछ ।

यस्तै लगनखेल वितरणकेन्द्रको जावलाखेल फिडरअन्तर्गत पर्ने पाटन हस्पिटल, कुमारीपाटी, मानभवन, जावलाखेल र ए.भी.एम. चोकलगायत क्षेत्रमा पनि विद्युत मर्मतसम्भारको काम हुने भएकाले  मध्याह्न १२ बजेदेखि २ बजेसम्म बत्ती जाने प्राधिकरणले जनाएको छ ।

पुल्चोक वितरण केन्द्रको पाटन फिडर अन्तर्गत पर्ने रियो अपार्टमेन्ट क्षेत्रमा पनि ११ बजेदेखि २ बजेसम्म बत्ती कटौती हुनेछ ।

११ केभी क्षमताको लाइनको काम गर्नुपर्ने भएकाले त्यस क्षेत्रमा पनि तीन घण्टा बिजुली जाने भएको हो । पाटन फिडरअन्तर्गत पर्ने हनुमानथान, प्रसूति गृह, रियो अपार्टमेन्ट, शङ्खमूल, यूएनपार्क, चाकुपाट, पुलचोक क्याम्पस, भाटभटेनीलगायत क्षेत्रमा दिउँसो २ बजेमात्रै बत्ती आउनेछ ।

भक्तपुरको इटापाखे, सल्लाघारी, केएमसी हस्पिटल, दुवाकोट हाइट, एपी भैरव र झौखेल क्षेत्रमा १२ बजेसम्म बत्ती जाने नेपाल विद्युत प्राधिकरणले जनाएको छ । भक्तपुर वितरण केन्द्रको कटुन्जे फिडरमा पर्ने वीर नेक कलेज नजिकै ट्रान्सफर्मर जडानलगायतको काम गर्नुपर्ने भएकाले १० बजेदेखि विद्युत कटौती गर्न लागिएको प्राधिकरणले जनाएको छ ।

काठमाडौँको बुढानिलकण्ठ उपवितरण केन्द्रको चुनिखेल फिडरअन्तर्गत पर्ने हात्तीगौँडा टेलिकम क्षेत्रमा मर्मतको काम गर्नुपर्ने भएकाले स्पेशल चोक, हात्तीगौँडा, ज्ञानेश्वरलगायत क्षेत्रमा दिउँसो १ बजेदेखि २ बजेसम्म विद्युत कटौती हुनेछ ।