काठमाडौँ– बैंकहरुमा ब्याजदर बढाउने होडबाजी चलेपछि केन्द्रीय बैंक नेपाल राष्ट्र बैंकले हस्तक्षेप गरेको छ । मंगलबार बैंकहरुलाई तीन बुँदे निर्देशन दिँदै राष्ट्र बैंकले ब्याजदर घटाउन भनेको छ ।
बैंकहरुले ११.१० प्रतिशतसम्म ब्याजदर पुर्‍याएपछि राष्ट्र बैंकले हस्तक्षेप गरेको हो ।

बैंकहरुले ब्याजदर परिवर्तन गर्दा अघिल्लो महिनाको तुलनामा १० प्रतिशतभन्दा बढी बढाउन वा घटाउन पाउने छैनन् । यस्तै व्यक्तिगततर्फको मुद्दती निक्षेपको ब्याजदर संस्थागतभन्दा १ प्रतिशत बिन्दुले बढी हुनुपर्ने छ ।

साथै, बैंक तथा वित्तीय संस्थाले कात्तिक महिनाका लागि प्रकाशित भइसकेको ब्याजदर समेत बढी भएको अवस्थामा संशोधन गर्नुपर्नेछ । यसरी कात्तिक ३ गतेभित्र आफ्नो वेवसाइटमा सार्वजनिक गर्ने गरी सोही मितिबाट लागू गर्नुपर्नेछ । यस्तो ब्याजदर कात्तिक ५ गतेभित्र दैनिक पत्रिकामा समेत प्रकाश गर्नुपर्नेछ ।