पोखरा– मनाङको चामेस्थित मर्स्याङ्दी नदी थुनिएपछि जोखिममा रहेको तटीय क्षेत्रमा खतरा टरेको छ।

मर्स्याङ्दी नदीले बगाएर ल्याएको काठ दाउराका साथै माथिबाट खसेको पहिरोले गर्दा थुनिएको नदी नेपाली सेनाको सक्रियतामा खुलाइएपछि खतरा टरेको हो ।

चामे जाने ठूलो पुल नजिक शनिबार बिहान पहिरो जाँदा मर्स्याङ्दी नदी थुनिएको थियो । असार नलाग्दै मनसुन शुरु भएको पहिलो वर्षाले गण्डकीको मनाङसहित देशका विभिन्न ठाउँमा ठूलो क्षति पुर्‍याएको छ ।

मनाङको चामे गाउँपालिकाको वडा नम्बर ४ र ५ भएर बग्ने मर्स्याङ्दी नदी थुनिएको भाग पूर्ण रुपमा नखुल्दा नदीको तटीय क्षेत्रमा रहेका बासिन्दाहरुमा जोखिम भने कायमै रहेको मनाङका प्रमुख जिल्ला अधिकारी विष्णु लामिछानेले बताए ।

शनिवार बिहानैदेखि पानी परिरहेकाले तल्लो तटीय क्षेत्रमा जोखिम रहेको प्रजिअ लामिछानेले बताए । मस्याङ्दी नदीको बाढीले ढुंगा मुढा र लेदोसहित बगाएर ल्याएकाले नदी थुनिने सम्भावना अझै रहेकाले सतर्क रहन प्रशासनले अपिल गरेको छ ।

असार १ गते आएको बाढीपहिरोले मनाङको तीन पालिका पूर्ण रुपमा प्रभावित भएको छ । त्यो दिनको बाढीले चामे, नासो र ङिस्याङ गाउँपालिकाका अधिकांश स्थानमा क्षति पुर्‍याएको थियो ।

सडक अवरुद्ध हुँदा उद्धारमा कठिनाइ

बाढीले मनाङका विभिन्न ठाउँका सडक तथा पुल पुलेसा बगाएर बाटो अवरुद्ध छ । बाटो अवरुद्ध हुँदा बाढीपीडितको उद्धारमा समेत कठिनाइ भएको छ ।

बाढीले चामे बजारमै रहेको हुलाक कार्यालय लगायत सरकारी कार्यालयहरु, बैंक रहेको भवनसमेत बगाएको छ । बाढीबाट विस्थापित तथा जोखिममा रहेका स्थानीयवासी चामे गाउँपालिका–५ माडाकुनामा निर्माण गरिएको कारागारमा बसेका छन् ।

यसअघि पनि मर्स्याङ्दी नदीमा आएको बाढीले नासोँ गाउँपालिका–१, ताल गाउँका ५० घर डुबानमा परेका थिए ।

बाढी प्रभावित मनाङको अवलोकन गर्न बिहीबार गण्डकी प्रदेशका मुख्यमन्त्री कृष्णचन्द्र नेपाली पोखरेलसहितको टोली सेनाको हेलिकोप्टरबाट केही राहत सामग्रीसहित चामे पुगेको थियो ।

बाढीपहिरोले क्षति पुर्‍याएको मनाङमा सडक, विद्युतसेवा सूचारु हुन सकेको छैन । मनाङ जोड्ने विभिन्न सडक र पुलहरु बाढीले बगाएकाले राहत तथा उद्धारमा पनि समस्या भइरहेको छ ।