काठमाडौँ– लुम्बिनी प्रदेशका मुख्यमन्त्री शंकर पोखरेलले मन्त्रिपरिषद् पुनर्गठन गरेका छन् ।

नेपाली कांग्रेस, माओवादी केन्द्र र जनता समाजवादी पार्टीका सांसदहरु मिलेर सोमबार अविश्वास प्रस्ताव दर्ता गरेपछि जसपाकै सांसदहरुलाई सामेल गराएर मुख्यमन्त्री पोखरेलले मन्त्रिपरिषद् पुनर्गठन गरेका हुन् ।

उनले भौतिक पूर्वाधार तथा विकास मन्त्रीमा विकाश पाण्डे, भूमि व्यवस्था तथा सहकारी मन्त्रीमा विजय बहादुर यादव, शिक्षा तथा सामाजिक विकास मन्त्रीमा कल्पना पाण्डे र भौतिक पूर्वाधार राज्य मन्त्रीमा सुमन शर्मा रायमाझीलाई नियुक्त गरेका हुन् ।

कल्पना पाण्डेबाहेक अरु तीन जनाले अविश्वासको प्रस्तावमा हस्ताक्षर गरेका थिए । जसपाको सहयोग नरहे अविश्वासको प्रस्ताव पारित हुने अवस्था छ ।

आजै नेपाली कांग्रेस, माओवादी केन्द्र र जसपाका सांसदहरु मिलेर अविश्वास प्रस्ताव दर्ता गरेपछि लुम्बिनी प्रदेशका मुख्यमन्त्री पोखरेलको पद धरापमा परेको थियो। जसपाका सांसदहरुको साथ लिएर मन्त्रिपरिषद् विस्तार गरेसँगै उनको पद जोगिने अवस्था सिर्जना भएको छ ।

यसअघि मुख्यमन्त्री पोखरेलविरुद्ध सोमबार प्रदेशसभा सचिवालयमा कांग्रेस, माओवादी केन्द्र र जसपाका सांसदहरुले अविश्वासको प्रस्ताव दर्ता गरेका थिए । तीन दलका ४१ जना सांसदले हस्ताक्षर गरी अविश्वास प्रस्ताव दर्ता गरेपछि मुख्यमन्त्री पोखरेलको पद धरापमा पर्ने अवस्थामा पुगेको थियो ।

जनता समाजवादी पार्टीका ६ जना सांसदमध्ये महन्थ ठाकुर पक्षकी कल्पना पाण्डेले अविश्वास प्रस्तावमा हस्ताक्षर गरेकी थिइनन् ।

८७ सदस्य रहेको लुम्बिनी प्रदेशसभामा एमालेका ४१, माओवादी केन्द्रका २०, कांग्रेसका १९, जनता समाजवादीका ६ र राष्ट्रिय जनमोर्चाका १ जना सदस्य छन्।

लुम्बिनी प्रदेशमा नयाँ सरकारको आह्वान गर्दै आन्तरिक मामिला तथा कानून मन्त्री कुलप्रसाद केसी र सामाजिक विकास मन्त्री सुदर्शन बरालले राजीनामा थिएका थिए ।

उनीहरुले मुख्यमन्त्री पोखरेललाई संयुक्त रुपमा राजीनामा पत्र बुझाएका थिए । नेकपा एमालेका अध्यक्ष तथा प्रधानमन्त्रीले कम्युनिस्ट आन्दोलनको एकीकरण र जनभावना विपरित आफ्ना कदमहरु गरिरहेको आरोप लगाउँदै उनीहरुले पदबाट राजीनामा दिएका थिए ।