काठमाडौँ – नेकपा एमालेको माधव नेपाल समूहमा रहेका युवा नेता विष्णु रिजाल अध्यक्ष केपी शर्मा ओलीले बोलाएको पार्टीको बैठकमा सहभागी भएका छन् ।

बालुवाटारमा आयोजित पार्टीको महाधिवेशन आयोजक समितिको बैठकमा सहभागी भएका उनले ओली समूहमा खुल्दै नेपाल समूह छाडेको सन्देश दिएका हुन् ।

प्रधानमन्त्री ओलीको चर्को आलोचना गर्दै आएका नेता रिजालले पछिल्लो समय एमाले एकताबद्ध हुनुपर्नेमा जोड दिंदै आएका छन् । उनी माधव नेपाल प्रधानमन्त्री हुँदा उनको प्रेस सल्लाहकार थिए ।

नेकपामा हुँदा रिजाल नेता नेपालकै जोडबलमा विदेश विभागको उप-प्रमुख बनाइएका थिए । अर्थमन्त्री विष्णु पौडेलसँग निकट सम्बन्ध रहेका नेता रिजाललाई नेपालको किचेन क्याबिनेटको सदस्यका रुपमा लिईन्थ्यो । उनी नेकपा हुँदा कार्यकारी अध्यक्ष प्रचण्डसँग पनि निकट थिए । प्रधानमन्त्री ओलीले प्रतिनिधिसभा विघटन गरेपछि उनले त्यसको चर्को विरोध गर्दै आएका थिए ।

फागुन २३ मा सर्वोच्च अदालतले नेकपा एमाले र माओवादी केन्द्र ब्यूँताइदिएको थियो । त्यसपछि उनी नेपालसँगै थिए । तर, पछिल्लो समय भने उनले प्रधानमन्त्रीको समर्थनमा सार्वजनिक रुपमा बोल्दै आएका छन् । प्रधानमन्त्री ओलीले बोलाएको आजको बैठकमा रिजाल सहभागी भएपछि उनले कित्ता परिवर्तन गरेको पुष्टि भएको हो ।