काठमाडौँ– वाणिज्य, आपूर्ति तथा उपभोक्ता संरक्षण विभागले उत्पादन लागतको अनुपातमा बढी मूल्य कायम गरी उपभोक्ता ठग्ने दुई तेल कम्पनीमाथि कारबाही गरेको छ ।

बारा जिल्लास्थित अन्नपूर्ण भेजिटेवल प्रा.लि. र महालक्ष्मी सोल्भेन्ट एण्ड रिफाइनरी प्रा.लि.ले उत्पादन लागतको अनुपातमा बढी मूल्य कायम गरी खाने तेल बिक्री वितरण गरेको पाइएपछि दुबै कम्पनीलाई ३ लाखका दरले जरिवाना गरेको विभागले जनाएको हो ।

विभागका निर्देशक एवं प्रवक्ता शिवराज सेढाईंले उक्त दुई तेल कम्पनीले उपभोक्ता संरक्षण ऐन २०७५को दफा १६ (२) (क) विपरीत खाने तेल बिक्री वितरण गरेको पाइएकोले जरिवाना गरिएको जानकारी दिए ।

‘ऐनको बमोजिम दुबै कम्पनीलाई ३ लाख रुपैयाँका दरले जरिवाना गरिएको छ,’ निर्देशक सेढाईंले भने,’अस्वभाविकरुपमा बढाइएको मूल्यवृद्धि सच्याउन निर्देशन समेत दिइएको छ । निर्देशनको पालना नभएको अवस्थामा कानून बमोजिम थप कारबाही हुनेछ।’