काठमाडौँ- अखिल नेपाल फूटबल संघ(एन्फा) को साधारणसभा सुरू भइरहँदा भक्तपुर जिल्ला फूटबल संघ आन्दोलन गरिरहेको छ।

मंगलबार ललितपुरको एक होटलमा साधारणसभा सुरू भइरहँदा सभाहलमा पत्र छाडिएको थियो। जसमा लेखिएको छ,`एन्फाको साधारणसभामा सहभागी सम्बन्धमा´।

उक्त पत्र एन्फाको कार्यसमितिबाट बर्खास्त गरिएको जिल्ला फूटबल संघका अध्यक्ष गौतम सुजखुले हस्ताक्षर गरेका छन्।

उनले १९ औँ साधारणसभामा एन्फाले जिल्ला संघलाई आमन्त्रण नदिएको भन्दै आक्रोश पोखेका छन्। एन्फाले उनको नेतृत्वको कार्यसमितिलाई बर्खास्त गरेपछि बनाएको तदर्थ समिति गठनमा एन्फा विधानले नदिँदा जारी साधारणसभामा तत्कालीन जिल्ला कमिटीले सहभागी हुन पाउनुपर्ने माग राखेका छन्।

सुजखुको नेतृत्वको टिमलाई एन्फाले विघटन गरेपछि एन्फाले तदर्थ समिति बनाएको थियो। तर, त्यसले पनि पूर्णता पाउन सकेको छैन। यसैबीच सुजखु नेतृत्वले जिल्ला अदालत भक्तपुरमा एन्फाको निर्णयविरुद्व उजुरी दिएको छ। जसको सुनुवाइ भएको छैन।

मुद्दा अदालतमा विचाराधीन रहँदा आफ्नो नेतृत्वको जिल्ला समितिले साधारणसभामा सहभागी हुन पाउनु पर्ने भन्दै सभाहलमा पर्चा फालिएका थिए ।