मुम्बई(बलिउड लाइफ)– बलिउडमा केही दिन अघिमात्र अभिनेता फरहान अख्तर र अभिनेत्री रकुलप्रीत सिंहले निर्देशक आशुतोष गोवारिकरको फिल्म ‘पुकार’मा हस्ताक्षर गरेको खबर बाहिर आएको थियो । यसै वर्षको अन्त्यमा सुटिङ हुने सय करोड बजेटको फिल्ममा जंगलको महत्वलाई देखाइने बताइएको थियो । तर अहिले भने यो फिल्मको निर्माण काम बन्द भएको खुलासा भएको छ ।

समाचारअनुसार निर्देशक गोवारिकरले लेखक जावेद अख्तरसँग मिलेर यो फिल्मको कथा लेख्ने तयारी गरिरहेका थिए । लामो समयदेखि कुनै पनि फिल्म नलेखेका जावेद यो फिल्म लेख्न उत्सुक थिए । जसै फिल्म लेख्न सुरु गरे, फिल्ममा केही गडबढ देखियो । कैयौं हप्तासम्म फिल्मको गडबढलाई समाधान गर्न खोजे पनि समाधान हुन नसकेपछि फिल्म बन्द भएको छ ।

फिल्मका निर्माताले काँचो कथामा फिल्म नबनाउने अडान लिएका थिए । वर्षौपछि फिल्म लेखनमा आएका जावेदबाट दर्शकले हेर्ने खालको कथा निर्माताले चाहेका थिए । जुन चाहना पुरा हुन सकेन ।

आशुतोषको पछिल्लो फिल्म ‘पानीपत’ निकै ठूलो बजेटमा निर्माण भएको थियो । तर बक्सअफिसमा फिल्मले खासै कमाल देखाउन सकेन ।