काठमाडौं– नेपालस्थित इजरायली राजदूतावासले इन्टरनेशनल साउण्ड सर्भिसेसको प्रावधिक सहकार्यमा ‘१३औं इजरायली फिल्म महोत्सव’को आयोजना गर्ने भएको छ । यो महोत्सव २६–२७ नोभेम्बर २०२१ अर्थात १०–११ मंसीर २०७८ मा होटल सोल्टीको पार्किङ क्षेत्रमा हुँदैछ ।

दुतावासले एक विज्ञप्ती जारी गर्दै यस महोत्सवसँगै नेपालमा पहिलोपटक ‘ड्राइभ–इन शो’को आयोजना हुन लागेको जानकारी दिएको छ । आफ्नै गाडीभित्रको सुरक्षित घेरामा बसेर हेर्ने यो फिल्म महोत्सवले कोरोनाका कारण बन्द भएको फिल्मी क्षेत्रलाई यस अवधारणाले टेवा दिने अपेक्षा आयोजकले राखेका छन् ।

आफ्नो परिवारसँग बसेर सामाजिक दूरी कायम राखेर फिल्म हेर्न चाहने कुनैपनि व्यक्तिको लागि यो शो खुला रहनेछ । तर आफ्नो पार्किङ स्थान सुरक्षित गर्नको लागि सोल्टी होटलको वेबसाइटमा गई फर्म भर्नुपर्ने हुन्छ । पार्किङ स्थानको अभावलाई ध्यानमा राखेर पनि शो अगावै आफ्नो गाडी पार्किङ सुरक्षित गर्न सकिनेछ ।

यस्ता सांस्कृतिक महोत्सवले दुई देशका जनता बिचमा प्रगाढ सम्बन्ध विस्तार गर्न मद्दत गर्नेछ भन्ने कुरामा दूतावास विश्वस्त रहेको जारी विज्ञप्तीमा जनाइएको छ ।

महोत्सवमा पहिलो दिन ‘गोल्डेन भ्वाइस’ र ‘लेसिस’ फिल्म देखाइनेछ भने दोस्रो दिन ‘ए प्लेस इन हेभन’ र ‘द अनअर्थोडक्स’ देखाइनेछ ।