मुम्बई(दैनिक जागरण)– बलिउड अभिनेता शाहरुख खानका छोरा आर्यन खान हाल मुम्बईस्थित आर्थर रोडको जेलमा बसिरहेका छन् । नारकोटिक्स कन्ट्रोल ब्यूरोको हिरासत समयावधि सकिएपछि उनलाई १४ दिनको न्यायिक हिरासतमा पठाइएको थियो । आर्यनको जमानतको आदेश अक्टोबर २० का लागि सुरक्षित गरिएको छ ।

समाचारअनुसार जेल अधिकारीहरुले आर्यन खानको सुरक्षा बढाएका छन् । उनलाई विशेष ब्यारेकमा लगिएको छ र जेल अधिकारीहरुले उनीमाथिको निगरानी बढाएका छन् । आर्यनले अहिले लागुऔषध मामलाका अन्य आरोपीहरुसँग कुराकानी र भेटघाट गरेका छैनन् ।

आर्यनले जेलको खाना खान रुचाएका छैनन । सुरुवाती केही दिन उनले बिष्कुटमात्र खाएका थिए । पिउनका लागि उनीसँग केही बोटल मात्रै मिनरल वाटर बाँकी छ । जेलको फोहोर ट्वाइलेट जानुपर्ने बाध्यताले पनि आर्यनले केही खानेकुरा नखाएको बताइएको छ ।

अधिकारीहरुका अनुसार आर्यनका आमाबुवाले उनलाई क्यान्टिन खर्चका लागि ४५ सय रुपैंयाँको मनी अर्डर पठाएका थिए । अहिले उनलाई घरेलु भोजन खानका लागि प्रतिबन्ध लगाइएको छ ।