काठमाडौँ– एमाले उपाध्यक्ष भीम रावलले सांसद पदबाट राजीनामा दिएकोमा अर्का उपाध्यक्ष वामदेव गौतमले असन्तुष्टि जनाएका छन् । राष्ट्रियसभा सदस्यसमेत रहेका गौतमले रावलले राजीनामा दिन आवश्यक नरहेको प्रतिक्रिया दिएका हुन् ।

सरकारलाई विश्वासको मत दिने सवालमा अदालतले स्वविवेकीय अधिकार प्रदान गरिसकेपछि कसैले राजीनामा दिइरहनु नपर्ने उनको भनाइ छ ।

राष्ट्रियसभा बैठक बस्नुपूर्व पत्रकारहरूसँग कुरा गर्दै गौतमले भने, ‘संवैधानिक इजासले नै राजीनामा गर्न पर्दैन भनेको छ । पार्टीको निर्णय मान्ने नमान्ने आफ्नो कुरा भएकाले यसमा राजीनामा दिइरहनु आवश्यक थिएन ।’

सरकारको पक्षमा मतदान गर्नेहरू पार्टीमा नरहने भनेर आज स्थायी कमिटीले गरेको निर्णयबाट डराउनु नपर्ने गौतमको भनाइ छ । यदि पार्टीले कारवाही गर्‍यो भने फेरि सर्वोच्चले पार्टीमा राख भन्ने आदेश दिने भएकाले डराउनु नपर्ने उनले बताए ।