काठमाडौँ– सत्तारुढ नेपाली कांग्रेसले आइतबारको प्रतिनिधिसभा बैठकमा अनिवार्य उपस्थित हुन आफ्ना सांसदहरुलाई ह्वीप जारी गरेको छ ।

संसद भवन नयाँ बानेश्वरमा आइतबार बसेको कांग्रेस संसदीय दलको बैठकले अनिवार्य उपस्थित हुन आफ्ना सांसदहरुलाई ह्वीप जारी गरेको कांग्रेस सचेतक पुष्पा भूसालले जानकारी दिइन् ।

सर्वोच्च अदालतको फैसलाबाट पुनर्स्थापित प्रतिनिधिसभाको पहिलो बैठक आइतबार अपरान्ह ४ बजे बोलाइएको छ । आइतबार नै दोस्रो बैठक बस्ने र प्रधानमन्त्री शेरबहादुर देउवाले विश्वासको मत लिने कार्यसूची छ ।

दलको बैठकमा प्रधानमन्त्री शेरबहादुर देउवाले अब मुलुकमा कोरोना विरुद्धको खोप अभाव नहुने बताएका थिए ।

प्रधानमन्त्री देउवाले विभिन्न देशबाट खोप आइरहेको र अन्य देशबाट पनि खोप ल्याउन सरकारले पहल गरिरहेको जानकारी दिए । त्यस्तै उनले सर्वोच्चको आदेशलाई स्वीकार गर्दै सहकार्यका लागि पूर्वप्रधानमन्त्री केपी शर्मालाई आग्रह गरिएको बताए । सरकारले सबै पक्षलाई समेटेर अघि बढ्ने उनको भनाइ छ ।

गठबन्धनमा सहभागी सबै दलले प्रधानमन्त्री देउवालाई विश्वासको मत दिने र बहुमत प्राप्त हुने विश्वास राखिएको कांग्रेस सचेतक भुसालले बताइन् ।