काठमाडौँ– एमाले वरिष्ठ नेता झलनाथ खनालले शेरबहादुर देउवा नेतृत्वको सरकारलाई विश्वासको मत दिन आह्वान गरेका छन् ।

उपचारका क्रममा हाल भारतमा रहेका नेता खनालले सरकारलाई अबको दुई वर्षसम्म कायम राख्नका लागि देउवा नेतृत्वको सरकारलाई विश्वासको मत दिन आह्वान गरेका हुन् । आज विज्ञप्ति जारी गर्दै नेता खनालले भनेका छन्, ‘देउवा सरकारलाई विश्वासको मत प्रदान गरौँ । सकेसम्म पार्टीमा सर्वसम्मत बनाउने प्रयास गरौँ । त्यो भएन भने पनि अन्तरपार्टी वैचारिक बहसहरु सञ्चालन गरौँ ।’

नेता खनालले एमाले एकता कायम राख्नका लागि २०७५ साल जेठ २ गतेअघिको अवस्थामा पार्टी संरचना फर्काउन समेत आग्रह गरेका छन् ।

पार्टीलाई राष्ट्रिय राजनीतिमा प्रभावकारी भूमिका खेल्ने अवस्थाको निर्माण गर्न दोस्रो तहका नेताहरुले गरेको प्रयासलाई समर्थन गर्न आग्रह गर्दै उनले एकतालाई उचित तरिकाले सम्बोधन गर्न नसकिए पार्टी एकता असम्भव रहेको समेत बताएका छन् ।