काठमाडौँ— प्रमुख प्रतिपक्षी दल नेकपा एमाले स्थायी कमिटीको आइतबारको बैठकमा पनि माधवकुमार नेपाल पक्ष अनुपस्थित भएको छ ।

ललितपुरको च्यासलस्थित तुलसीलाल स्मृति भवनमा मध्याह्नदेखि शुरू भएको बैठकमा नेपाल पक्षका कोही पनि सदस्य सहभागी भएका छैनन् ।

केन्द्रीय कमिटी बैठकको एजेन्डा तय गर्न र विधान अधिवेशनको तयारी गर्न बैठक डाकिएको पार्टी कार्यालयका सचिव शेरबहादुर तामाङले बताए । पार्टी संरचना २०७५ जेठ २ गते अगाडि फर्काउँदै आइतबारको बैठकमा नेपाल पक्षका नेतालाई समेत डाकिएको उनको भनाइ थियो । तर नेपाल पक्षका कुनै पनि नेता बैठकमा सहभागी भएका छैनन् ।

यसअघि शुक्रबारको बैठकमा पनि नेपाल पक्षको सहभागिता थिएन । उक्त बैठकले पार्टीको विवाद समाधान गर्न गठित कार्यदलले बुझाएको १० बुँदे सहमतिलाई अनुमोदन गरेको थियो । एमालेले यही साउन २५ देखि २७ गते विधान अधिवेशन गर्ने निर्णय गरेको छ ।

आजै हुने प्रतिनिधिसभामा प्रधानमन्त्री शेरबहादुर देउवाले विश्वासको मत लिँदैछन् । देउवालाई समर्थन गर्ने/नगर्ने विषयमा नेपाल समूह छुट्टै छलफलमा जुटेको छ ।