बुटवल– रुपन्देहीको सैनामैना नगरपालिका–३, निवासी ३९ वर्षीय रितु बानियाँलाई वैशाख १७ गतेदेखि सामान्य ज्वरो आयो । १६ गते जिल्लामा निशेधाज्ञा शुरू भएको थियो । उनी सैनामैनामा पसल चलाउँछन् । परिवारमा ३ वर्षीया छोरी प्राप्ति र श्रीमती २८ वर्षीया धुव्र कार्की बानियाँ छन् ।

सामान्य ज्वरो, रुघाखोकी र शरीर दुख्ने लक्षण देखिएपछि रितु घरैमा छुट्टै कोठामा बस्न थाले । आठ दिनपछि सैनामैना नगरपालिकाले कोरोना परीक्षण गर्न वडामा स्वाब संकलन गर्‍यो ।

रितु्को परिवारका तीनै जनाले स्वाब दिए । अर्को दिन सबै जनाको रिपोर्ट पोजेटिभ आयो । रितुका छोरीलाई सामान्य ज्वरो आएको थियो । बाबुआमा दुवैलाई सामान्य लक्षण देखिएको थियो ।

आमाछोरी एउटा कोठामा र रितु अलग्गै कोठामा बसे । रितुले भने, ‘छोरीलाई डाक्टरको सल्लाह अनुसार तातो पानी र सिटामोल खान दियौँ । तीन दिनपछि उनको ज्वरो पनि सञ्चो भयो । हामीलाई पनि बिस्तारै सञ्चो भएको महसुस भयो । पोषिलो खानेकुरा खाने, तातोपानी पिउने र बाफ लिने गर्‍यौँ ।’

छोरीलाई रुघाखोकी थियो । डाक्टरको सल्लानहअनुसार उनलाई भिडामिन सी, भिटामिन डी र प्यारासिटमोल दिए ।

रितु लकडाउनको अघिल्लो दिनसम्म पसलमै व्यस्त थिए । आफूलाई त्यहीँ कोरोना सरेको हुनसक्ने उनले बताए । ‘अक्सिजन अभावले ज्यान गएको समाचार सुन्दा आफू पनि नबाँचिने हो कि भन्ने पिर लाग्थ्यो,’ उनले भने, ‘हाम्रो लागि अठोट र मनोबल नै सबैभन्दा ठूलो बन्यो ।’

उनीहरु दश दिनपछि दोस्रो पटक स्वाब दिन बुटवलको प्याथ ल्याब गए । सबैको रिपोर्ट नेगेटिभ आयो । रितुले भने, ‘तीन वर्षकी छोरी पनि कोरोनालाई जित्न सफल भइन्, हामी धेरै खुशी भयौँ । मनोबल उच्च राख्नसके कोरोनालाई पराजित गर्न सकिने रहेछ ।’