काठमाडौँ – ‘ताऊ ते’ आँधीका कारण मुम्बईको समुद्रमा भारतका चारवटा पानी जहाज फस्दा ७ सय बढी मानिस अलपत्र परेका छन् । चारवटा पानी जहाजमा ७१० जना मानिस फसेको र त्यसमा २१५ जनाको उद्धार गरिएको भारतीय सञ्चारमाध्यमहरुले जनाएका छन् ।

मुम्बईबाट १७५ किलोमिटरको दूरीमा रहेको हिरा फिल्ड्समा बार्ज पी–३०५ पानी जहाजमा उद्धार कार्य जारी रहेको बताइएको छ । उक्त जहाजमा २७३ बढी मानिस सवार रहेको र १७७ जनालाई उद्धार गरिएको छ ।

यस्तै अर्को जहाज बार्ज गाल कन्स्ट्रक्टरमा १३७ जना सवार रहेकामा ३८ जनाको सकुशल उद्धार गरिएको बताइएको छ । ती दुवै जहाजसम्म उद्धार तथा सहयोग पुगिरहेको बताइएको छ ।

यस्तै भारतीय नौ सेनाका प्रवक्ता मेहुल कर्णिकलाई उदृत गर्दै भास्कर डटकमले जनाएअनुसार अर्को जहाज बार्ज पी–३०५ र बार्ज एसएस–३ समुद्रमा फसेका छन् ।

यी दुई जहाजमा ४९५ जना मानिस फसेको बताइएको छ । दुवै जहाजमा फसेका मानिसहरुको उद्धारका लागि तीव्रताका साथ काम भइरहेको जनाइएको छ । नौसेनाको हेलिकोप्टर तथा उद्धार दलले फसेका मानिसहरुको उद्धार जारी राखेका छन् ।

एजेन्सीको सहयोगमा