काठमाडौँ– नेपालमा पहिलो पटक आयोजना हुन लागेको फ्रेन्चाइज फुटबल प्रतियोगिता ‘नेपाल सुपर लिग’ को खेलाडी किनबेच (अक्सन) शुक्रबार हुने भएको छ ।

आयोजक नेपाल स्पोर्टस म्यानेजमेन्टले लिगको अक्सन शुक्रबार होटल सोल्टी क्राउन प्लाजामा हुने जनाएको छ ।

अक्सनबाट फ्रेन्चाइज टिमले ए, बी र सी श्रेणीबाट खेलाडी छनोट गर्ने छन् । अक्सनमा कुल १ सय ५८ जना खेलाडीलाई समावेश गरिएको छ । पहिलो संकरणको लिगमा ७ फ्रेन्चाइज टिमको सहभागिता रहने छ ।

लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् ।

त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।