काठमाडौं– वर्तमान अवस्थामा देशमा ‘प्रधानमन्त्री रोजगार कार्यक्रम’ चलिरहेको छ । प्रधानमन्त्री केपी शर्मा ओली स्वदेशमै रोजगारीको लागि आफूले विभिन्न पहिल गरिरहेको बताइरहेका छन् ।

यही मेशोमा प्रधानमन्त्री ओलीले लेखेको गीत ‘स्वदेशमै रोजगारी’ सार्वजनिक भयो । अहिले यो गीत इन्टरनेशनल मिडिया नेपाल (पीम नेपाल) ले गर्न लागेको ‘चौथो राष्ट्रिय समावेशी म्युजिक अवार्ड २०२१’ को ‘उत्कृष्ट राष्ट्रिय भावको गीत’को विधाको मनोनयनमा परेको छ ।

केही समय अघि आयोजक पीम नेपालले राजधानीमा ५३ विधाको मनोनयन सार्वजनिक गरेको थियो ।

प्रधानमन्त्री ओलीलाई उनको मनोनयनपत्र प्रधानमन्त्री निवास बालुवाटार पुगेरै आयोजकले दिएका छन् । फिल्मकर्मी मनोज भेटवाल, निर्देशक विश्वदीप घिमिरे र लेखक तथा निर्देशक मोहन निरौला बालुवाटार पुगेर मनोनयनपत्र दिएका हुन् ।

प्रधानमन्त्री ओलीको रचना, किरण क्रियशनको प्रस्तुति, नेता रमेश पौडेलको संयोजनमा तयार गरिएको ‘स्वदेशमै रोजगारी’ गीतमा मेलिना राई र शान्तिराम राईको स्वर तथा शान्तिराम राईकै संगीत रहेको छ ।