जनकपुरधाम– प्रदेश २ सरकारले मधेस स्वास्थ्य विज्ञान प्रतिष्ठानको कार्यालय संचालनमा ल्याएको छ ।

जनकपुरस्थित प्रादेशिक अस्पताल प्रारङ्गणमा मुख्यमन्त्री लालबाबु राउत र सामाजिक विकासमन्त्री नवल किशोर साहले प्रतिष्ठानको कार्यालय उद्घाटन गरेका हुन् ।

उद्घाटन समारोहमा बोल्दै मुख्यमन्त्री राउतले प्रतिष्ठानलाई अगाडि बढाउन हरेक किसिमको सहयोग गर्न प्रदेश सरकार तयार रहेको बताए । सबै रोगको उपचार प्रादेशिक अस्पतालभित्रै होस् भन्ने जनताको वर्षौदेखिको आकांक्षा अब पूरा हुने उनले विश्वास व्यक्त गरे ।

विगतभन्दा अहिले अस्पतालको अवस्थामा सुधार आएको पनि दावी गरे ।

‘अहिले सुरुवात हो । चिन्ता गर्नुपर्दैन । यँहा एमएस, एम्डी, एमबीबीएस लगायत सबै पढाइ हुन्छ,’ उनले भने,’सरकारी अस्पतालमा काम गर्ने डाक्टरले निजी क्लिनिक संचालन गर्न नपाउने नीति प्रदेश सरकार बनाउन लागेको छ ।’

उनले डाक्टरको तलब कम्तिमा डेढ लाख हुनुपर्ने पनि बताए । तलब सम्मानजनक नरहेकाले नै नीजि क्लिनिक संचालन गर्न डाक्टरहरु बाध्य हुने गरेको उनको भनाइ थियो ।

यस्तै सामाजिक विकासमन्त्री नवलकिशोर साहले प्रतिष्ठानको कार्यालय स्थापना भएपछि अब प्रदेशबासीको ठूलो सपना पूरा भएको बताए ।

‘सामान्य विरामी पनि प्रदेश १ वा प्रदेश ३ मा गएर उपचार गराउनुपर्छ । जसका कारण यस प्रदेशबाट धेरै रकम अन्य प्रदेशमा पुग्छ । त्यसैले पनि सबै रोगको उपचार होस् भन्ने उदेश्यले प्रतिष्ठान गठन भएको छ ।’