काठमाडौं- नेपाली कांग्रेसका सभापति शेरबहादुर देउवा र वरिष्ठ नेता रामचन्द्र पौडेलबीच भेटवार्ता भएको छ ।

सोमबार अपराह्न सभापति देउवा वरिष्ठ नेता पौडेललाई भेट्न बोहराटार पुगेका हुन्। देउवासँग पौडेलले करिब एक घण्टा छलफल गरेको बुझिएको छ ।

प्रतिनिधिसभा विघटनविरुद्ध पार्टीभित्रबाट फरक-फरक विचार आइरहेका बेला देउवाले बोहोराटारमै पुगेर पौडेललाई भेट्नुलाई अर्थपूर्ण रुपमा हेरिएको छ ।

भेटमा असोज १२ मा पौडेल पक्षले केन्द्रीय समितिमा पेस गरेको विरोध पत्रका विषयमा छलफल भएको पौडेलको सचिवालयले जनाएको छ ।

प्रतिनिधिसभा विघटनविरुद्ध पार्टीका नेताहरुबाट आइरहेका फरक फरक विचारका विषयमा पनि छलफल भएको जनाइएको छ ।

भेटमा गत बुधवार नेकपाका ‘प्रचण्ड-नेपाल’ पक्षका अध्यक्षद्वय पुष्पकमल दाहाल प्रचण्ड र माधवकुमार नेपालले आफूसँग राखेको प्रस्तावबारे पनि देउवाले पौडेललाई जानकारी गराएको बुझिएको छ ।

प्रचण्ड- नेपाल समूहलेले सडक संघर्ष, केन्द्रदेखि प्रदेशको सत्ता र निर्वाचनको समीकरणका सन्दर्भमा देउवा सामूह प्रस्ताव राखेका थिए ।

कांग्रेसले संसद विघटनको कदमलाई अलोकत्रान्त्रिक र असंवैधानिक भन्दै विरोधसभालाई निरन्तरता दिँदै आएको छ।