काठमाडौं– नेपाली संगीत क्षेत्रमा साढे चार दशकदेखि सक्रिय लोकगायिका चन्द्रकला शाहलाई ५१ हजार रुपैंयाँ राशीसहित ‘कन्हैया सिंह राष्ट्रिय संगीतकर्मी पुरस्कार–२०७८’बाट पुरस्कृत गरिएको छ । उनलाई मंगलबार मँगलबार काठमाडौंमा एक कार्यक्रमका बीच संगीतकार तथा नेपाल संगीत तथा नाट्य प्रज्ञा प्रतिष्ठानका पूर्व उपकुलपति शम्भुजीत बासकोटालगायतले पुरस्कृत गरेका हुन् ।

पछिल्लो समय अमेरिकामा बस्दै आएका संगीतकार तथा गायक कन्हैयासिंह परियारले आफ्नो ५० औं जन्मदिनको अवसर पारेर ‘कन्हैया सिंह राष्ट्रिय संगीतकर्मी पुरस्कार–२०७८’ स्थापना गरेका थिए । उनी काठमाडौं आएको बेला गायिका शाहलाई पुरस्कृत गरिएको हो ।

कार्यक्रममा संगीतकार बासकोटाले नेपाली लोकसंगीत सिर्जना र भाका संकलनमा चन्द्रकलाको योगदानको स्मरण गरे । ‘उहाँलाई करारमा काम गरिरहेको बेला रेडियो नेपालले बिना कारण जागिर खोसेर बेरोजगार बनाएको बेला सिंहले आफ्नो नाममा स्थापित पुरस्कारबाट पुरस्कृत गर्नु प्रशंसनीय काम हो’, उनले भने ।

टिका गोपाल डिजिटल एम क्रियसनले आयोजना गरेको सो कार्यक्रममा गायिका शाहले पुरस्कारको रकमबाट धेरै समयदेखि रोकिएको आफ्ना गीतहरुको पुस्तक प्रकाशन गर्ने बताइन् ।

गायक कन्हैया सिंहले चन्द्रकलाकै गीत सुनेर र गाएर आफ्नो बाल्यकाल बितेको बताए ।