मुम्बई– भोजपुरी फिल्ममा अभिनय गरिसकेका एक अभिनेतालाई दक्षिण पूर्वी दिल्लीको एन्टी अटो थेफ्ट स्क्वाड टिमले पक्राउ गरेको छ ।

यी अभिनेता फेक करेन्सी रेकेडका मास्टरमाइण्ड रहेको र दिल्ली प्रहरीले उनीबाट ५० लाख फेक करेन्सी र चोरीका दुई बाइक बराम गरेको छ ।

जीन्यूजमा प्रकाशित समाचारअनुसार आरोपी अभिनेता मोहम्मद शाहिदउर्फ राज सिंहउर्फ ललन र सैयद जैन हुसेनलाई प्रहरीले पक्राउ गरेको हो । शाहिदले भोजपुरी फिल्म ‘इलाहाबाद से इस्लामाबाद’मा काम गरिसकेका छन् ।

एन्टी अटो थेफ्ट स्क्वाडका इन्स्पेक्टर कैलाश विष्टले यो अन्रराज्य अटो लिफ्टर ग्याङको पर्दाफास गरेको हो । पक्राउ परेका शाहिदले कैयौं भोजपुरी गीतमा अभिनय गरिसकेका छन् ।

समाचारअनुसार पछिल्लो केही दिनमा दक्षिण पूर्वी जिल्लामा कैयौं गाडी चोरीका घटनाबारे प्रहरीमा निवेदन परेको थियो । त्यसपछि प्रहरीले यो विषयमा अनुसन्धान गर्न एक टिम बनाएको थियो ।

उजुरी बढेपछि प्रहरीले जमानतमा छुटेका केही अपराधीको सूची तयार पारेको थियो । त्यही सूची अनुसार प्रहरीले गरेको अपरेसनमा अभिनेता शाहिदसहित उनका साथी पक्राउ परेका हुन् ।

प्रहरीले शाहिदलाई पक्राउ गरेपछि उनले हरि नगर आश्रममा एक फिल्म स्टुडियो चलाउने गरेको खुलेको छ । उनले स्टुडियोको नाम साहिल सैनी फिल्म प्रोडक्स हाउस राखेका थिए ।

प्रहरीका अनुसार लडकाउनपछि शाहिदलाई निकै आर्थिक घाटा भएको थियो । आर्थिक घाटा भएपछि शाहिद अटो लिफ्टर सैयद जैन हुसेनको सम्पर्कमा आए ।

त्यसपछि उनी फर्जी नोटको गिरोहको सम्पर्कमा आए । यसपछि उनी बाइक चोर्ने अभियानमा लागे । अभिनेता शाहिद पाँच कक्षासम्म मात्र पढेका छन् । उनी जामियानगरको बाटला हाउसमा बस्छन् ।

प्रहरीका अनुसार उनलाई यसअघि नै ८ मुद्दा लागिसकेको छ । जसमा जालसाजी, स्नेचिङ र हातहतियारसम्बन्धी मुद्धा छन् ।