कराँची– कोरोना भाइरसको संक्रमण रोकथाम तथा नियन्त्रणका लागि पाकिस्तानको सिन्ध प्रान्तमा थप गरिएको लकडाउनबारेको समाचार संकलन गर्ने क्रमममा प्रहरीले एक जना पत्रकारमाथि हातपात गरेको छ ।

कराँचीस्थित फेडरल बी क्षेत्रमा समाचार संकलनमा खटिएका उनलाई प्रहरीले कुटपिट गरेको बताइएको हो ।

अन्तराष्ट्रिय समाचार एजेन्सीमा आबद्ध पत्रकार फरिद खानमाथि प्रहरीले हातपात गरेको जनाइएको छ । आफूले कार्यालयको आधिकारिक कार्ड र क्यामेरा देखाए पनि प्रहरीले आफूमाथि दुर्व्यवहार र हातपात गरेको पत्रकार फरिदले बताएका छन् ।

आफूलाई बलपूर्वक प्रहरी भ्यानमा कोचेर प्रहरी चौकी लगी गैरकानूनी रुपमा हिरासतमा राखेको उनले बताए । उक्त घटनाको केही घण्टापछि सौदाबादमा अर्का पत्रकारमाथि प्रहरीले दुर्व्यवहार गरेको घटना सार्वजनिक भएको थियो ।

कोभिड १९ को जोखिम कायमै रहेको बेला मापदण्ड विपरीत रेस्टुरेन्ट सन्चालन गरिएकोबारे समाचार संकलनका क्रममा एक निजी टेलिभिजनका रिपोर्टर, ओबी भ्यान अपरेटर र चालकको टोलीमाथि रेस्टुरेन्टका कर्मचारीहरुले आक्रमण गरेको जनाइएको छ ।

विश्व प्रेस स्वतन्त्रताबारे २०२१ को रिपोर्ट अनुसार पत्रकारिता अभ्यास र सुरक्षाका दृष्टिकोणले पाकिस्तान जोखिमयुक्त मुलुक रहेको देखाएको छ । पत्रकारहरुमाथि यस्तो दुर्व्यवहार बिरुद्ध पत्रकार समूहले घोर निन्दा गरेका छन् ।