काठमाडौँ– प्रमुख प्रतिपक्षी दल नेपाली कांग्रेसले प्रतिनिधिसभा सचिवालयमा मंगलबार तीन महत्पूर्ण प्रस्ताव दर्ता गराएको छ ।

कांग्रेसले जरुरी सार्वजनिक महत्वको प्रस्ताव, ध्यानाकर्षण र संकल्प प्रस्ताव सचिवालयमा दर्ता गराएको हो । तीनवटै प्रस्तावको प्रस्तावकमा सांसद डा. डिला पन्त संग्रौला रहेकी छन् ।

प्रस्ताव एउटा विदेशमा नेपाली श्रमिकले रोजगारी गुमाएको सम्बन्धी, एउटा घरेलु हिंसासम्बन्धी र एउटा महिला र बालबालिका हिंसासम्बन्धी छ । तीनवटै प्रस्ताव गृह मन्त्रालयसँग सम्बन्धित छन् ।

प्रस्तावक संग्रौलाले वैदेशिक रोजगारीबाट फर्किएका महिला तथा युवाको व्यवस्थापन, बलात्कारको घटनामा पीडितलाई न्याय र अपराधीलाई दण्ड सजायका साथै छिटो छरितो अनुसन्धान प्रक्रिया अगाडि बढाउन र घरेलु हिंसा सम्बन्धमा गरी तीनवटा प्रस्ताव दर्ता गराएको जानकारी दिइन् ।