काठमाडौँ– नेकपा प्रचण्ड–नेपाल  समूहका नेता देवेन्द्र पौडेलले प्रधानमन्त्री केपी शर्मा ओलीको कदमविरूद्ध संयुक्त आन्दोलन गर्नुपर्ने बताएका छन् ।

मंगलबार रिपोर्टर्स क्लब नेपालले काठमाडौंमा आयोजना गरेको विशेष साक्षात्कारमा बोल्दै नेता पौडेलले मुलुकलाई नै संकटमा पार्ने गरी ओलीबाट भएको असंवैधानिक कदमविरुद्ध संयुक्त आन्दोलन गर्नुपर्ने बताएका हुन ।

नेता पौडेलले प्रधानमन्त्री ओलीले निर्वाचन गर्नको लागि यो स्टेप नचालेको पनि दाबी गरे । पौडेलले प्रधानमन्त्री ओली नेतृत्वको वर्तमान सरकारको तीन वर्ष उपलब्धिविहीन भएको तर्क गरे ।

साक्षात्कारमा कांग्रेसका नेता आनन्दप्रसाद ढुंगानाले प्रधानमन्त्री ओलीको प्रतिनिधिसभा विघटन गर्ने कदम असंवैधानिक, अलोकतान्त्रिक भएको भनेर आफ्नो पार्टीले पहिल्यै नै ठहर गरेको र अहिले संघर्षमै रहेको बताए ।

उनले आगामी वैशाख १७ र २७ गते निर्वाचन भएन भने देश अन्धकारतर्फ धकेलिनेमा चिन्ता व्यक्त गरे ।

त्यस्तै नेकपा (क्रान्तिकारी माओवादी) का वरिष्ठ नेता सिपी गजुरेलले सरकारविरुद्ध संयुक्त आन्दोलन गर्न सकिने तर, त्यसको लागि अहिलेको व्यवस्था नै गलत हो भनेर दलहरुले विचार गर्नुपर्ने बताए ।

अहिलेको राजनीतिक समस्या/संकटको समाधान अब संयुक्त वैकल्पिक सरकार बनाएर व्यवस्थाको विकल्प खोज्नुपर्ने उनले बताए ।