मेक्सिको सिटी– मेक्सिकोकी ब्यूटी क्वीन लौरा मोजिका रोमेरोलाई स्थानीय प्रहरीले अपहरणको आरोपमा पक्राउ गरेको छ । मेक्सिको सिटी प्रहरीले ‘मिस मेक्सिको २०१९’की प्रतियोगीसमेत रहेकी लौरालाई पक्राउको पुष्टि गरेको छ ।

उनीमाथि लागेको आरोप पुष्टि भएमा उनलाई ५० वर्षको जेल सजाय हुने स्थानीय सञ्चारमाध्यमले जनाएका छन् । मेक्सिको प्रहरीले यो मामलामा लौरासहित ८ व्यक्तिलाई पक्राउ गरेको छ ।

२५ वर्षीया लौरा ओएक्साका र वेराक्रुज जस्ता शहरमा अपहरणको धन्दा गर्ने एक आपराधिक समूहको सदस्य हुन् । वेराक्रुजको राज्य अधिकारीले उनीहरुलाई गत फेब्रुअरी ११ मा सहरको एक घरबाट पक्राउ गरेको पुष्टि गरेका छन् ।

हाल प्रहरीले उनीहरुको विषयमा अनुसन्धान गरिरहेको छ । सबै ८ आरोपीहरु आगामी दुई महिनाका लागि हिरासतमा रहनेछन् । यो मामलामा लौराको नाम आएपछि सबै चकित परेका छन् ।

बिजनेस ग्राजुएट लौरा अंग्रेजी भाषामा पारंगत छिन् । उनी स्तन क्यान्सर र ल्यूकेमिया जस्तो रोगका विरुद्ध जागरण अभियान चलाउन चिनिन्छिन् । उनले सन् २०१५ मा ‘मिस अर्थ ओएक्साका’ उपाधि पनि जितेकी थिइन् ।

उनले सन् २०१९ मा ‘मिस मेक्सिको’ प्रतियोगितामा सहभागिता जनाएर थर्ड रनर अप भएकी थिइन् ।
–एजेन्सी