काठमाडौँ– गुणस्तरहीन ह्याण्ड सेनिटाइजर उत्पादन तथा बिक्री गरेको आरोपमा प्रहरीले दुई जनालाई पक्राउ गरेको छ ।

महानगरीय अपराध महाशाखाबाट खटिएको टोलीले सेनिटाइजर उत्पादन कम्पनी मेडिग्राफ ग्रुप अफ कम्पनी लोकन्थलीमा कार्यरत रामेछापका सुजन गौतम र बझाङ घर भइ हाल कोटेश्वर बस्ने चन्द्रप्रसाद जोशीलाई पक्राउ गरेको हो ।

कमसल सेनिटाइजर उत्पादन गरी विक्री भइरहेको भन्ने विशेष सूचनाका आधारमा प्रहरीले ‘नेपाल ह्याण्ड सेनिटाइजर’ नामक सेनिटाइजर उत्पादन गर्ने कम्पनीका दुई जनालाई पक्राउ गरेको अपराध महाशाखाका सूचना अधिकृत प्रहरी उपरीक्षक कृष्ण प्रसाद पंगेनीले जानकारी दिए ।

सोही कम्पनीका सञ्चालक काठमाडौँ सामाखुसी बस्ने सुजन दाहाल भने फरार रहेको र उनको खोजी जारी रहेको सूचना अधिकृत पंगेनीले बताए ।

उक्त कम्पनीबाट प्रहरीले सेनिटाइजर, मेसिन बरामद गरेको छ । पक्राउ परेका दुईजनालाई कमसल माललाई असल भनी झुक्याइ विक्री गरेको एवं औषधी मिसावट गरी विक्री गरेको कसुरमा कालो बजारी तथा केही अन्य सामाजिक अपराध ऐन अन्तर्गत कारबाहीका लागि महानगरीय वृत्त सानोठिमी पठाएको छ ।