काठमाडौँ– सोमबारदेखि निरन्तर जारी वर्षाले भूपी शेरचण राजमार्ग अवरुद्ध भएको छ ।

म्याग्दी, मुस्ताङ, र बाग्लुङ हुँदै कास्की जाने उक्त राजमार्गको विभिन्न ठाँउहरुमा साना ठूला पहिरो जाँदा सडक अवरुद्ध भएको हो ।

राजमार्गको सत्रधारा भन्ने ठाँउमा सोमबार राति ८ बजे ठूलो पहिरो गएको र त्यसलाई खुलाउन प्रयास भइरहेको पर्वतकी प्रमुख जिल्ला अधिकारी देवी पाण्डे खत्रीले बताइन् ।

उनले भनिन्, ‘सडक खुलाउन खोज्दा माथिबाट पहिरो झरेकाले खुलाउन सकिएको छैन ।’

म्याग्दी, कालीगण्डकी लगायत खोलामा पानीको मात्रा निरन्तर बढिरहेकोले नदी वरपरका बस्ती तथा घरहरु ढुवानमा पर्न थालेका छन् ।

सोमाबारदेखि निरन्तर परेको वर्षाले कालिगण्डकीको बहाव उच्च भएको र त्यसले गर्दा पर्वत, गुल्मी र स्याङजालगायत जिल्लाका केही स्थानका बस्तीहरु ढुवान पर्न थालेका छन् ।

पर्वतको सेतीबेनीमा कालीगण्डकीका कारण जोखिम रहेकाले १० घरपरिवारलाई सुरक्षित स्थानमा सारेको सीडीओ खत्रीले जानकारी दिइन् ।

सदरमुकाम बेनी बजारका केही ठाउँमा कालीगण्डकी नदीले कटान गरिहेकोले पनि जोखिम बढेको उनको भनाइ छ ।

बाढी र पहिरोका कारण म्याग्दीका ग्रामीण सडकसमेत पूर्ण रूपमा अवरूद्ध भएको खत्रीले बताइन ।