मुम्बई(बलिउड हंगामा)– अभिनेता आमिर खानले अक्षय फाउण्डेसनको कोभिड–१९ राहत कोषको लागि गत आइतबार भारतीय पूर्व विश्व चेस च्याम्पियन विश्वनाथन आनन्दका चेस प्रतिष्पर्धा गरे । यो प्रतिष्पर्धाबाट उठेको रकम कोरोना पीडितको लागि खाद्यान्न सहयोग जुटाउने काममा खर्च गरिँदैछ ।

चेसका कुशल खेलाडीसमेत रहेका आमिरले गायक अरिजीत सिंहको ‘फन च्याट शो’मा विश्वनाथनको बायोपिकमा अभिनय गर्ने इच्छा व्यक्त गरेका छन् । उनले विश्वनाथनको दिमागले कसरी काम गर्छ भन्ने जान्न पनि उनको बायोपिकमा अभिननयको आवश्यकता रहेको औल्याए ।

कार्यक्रममा उनलाई ‘यदि तपाईंलाई विश्वनाथन आनन्दको बायोपिक फिल्मको अफर आयो भने के तपाईं प्रमुख भूमिकामा अभिनय गर्न इच्छुक हुनुहुन्छ ?’ भनेर सोधिएको थियो ।

‘के यो कुनै प्रश्न हो ? त्यसो त यो जवाफ दिनका लागि सबैभन्दा सजिलो प्रश्नमध्ये एक हो’, आमिरले भनेका छन्, ‘विशी(आमिरले विश्वनाथनलाई बोलाउने नाम) को भूमिका निभाउनु न केवल सम्मान र खुशीको कुरा मात्र होइन, उनको दिमागलाई उतार्नु पनि आफैंमा रोमाञ्चक हुनेछ । जब म कुनै भूमिका निभाउछु, त्यो व्यक्तिको दिमाग बुझ्ने कोशिस गर्छु । विशी एक वास्तविक व्यक्ति भएको नाताले म उनको दिमागलाई बुझ्न र उसको दिमागले कसरी काम गर्छ भन्ने थाहा पाउन ऊसँग धेरै समय बिताउन चाहन्छु ।’

उनले विशीको श्रीमति र परिवारसँग उसको दिमागले कसरी काम गर्छ भन्ने विषयमा कुराकानी गर्ने पनि खुलाए । ‘जब म पर्दामा विशीको भूमिका निभाउनेछु, म उसलाई सरप्राइज दिनेछु । तर यो काम साँच्चै भयो भने म निकै खुशी हुनेछु’, आमिरले भनेका छन् ।

आमिरको कुरा सुनिरहेका विश्वनाथनले आमिरलाई समस्यामा पार्न नचाहेको भन्दै ठट्टा गरे । ‘म तपाईंसँग प्रतिज्ञा गर्छु कि मेरो भूमिका निभाउनका लागि तपाईंलाई तौल बढाउनुहोस् भन्दिनँ’, उनले यसो भनिरहँदा आमिर हाँसेका थिए ।

आमिर हालका दिनमा आफ्नो फिल्म ‘लाल सिंह चड्डा’को सुटिङ पुरा गर्ने तयारीमा जुटेका छन् । फिल्ममा करीना कपूर खानको पनि अभिनय छ । अद्वैत चन्दन निर्देशित फिल्म हलिउडको सुपरहिट फिल्म ‘फरेष्ट गम्प’को रिमेक हो ।