काठमाडौँ–प्रदेश २ प्रमुख डा.राजेश अहिराजले प्रदेश २ का विविध विषयहरुलाई रेडियो नेपालले प्राथमिकता दिनुपर्ने विषयमा जोड दिएका छन् ।

केन्द्रीय कार्यालय सिंहदरबारमा विहीबार व्यवस्थापन पक्षसँग छलफल गर्दै प्रदेश २ का ओझेलमा परेका विविध विषयलाई रेडियो नेपालले प्राथमिकताका साथ प्रसारण गर्नुपर्नेमा जोड दिएका हुन् ।

छलफलमा प्रदेश प्रमुख डा.अहिराजले मानिसहरुको चेतनाको विकासमा रेडियो नेपालको भूमिका अग्रणी रहेको बताए । उनले भने, ‘ जातीय, क्षेत्रीय एवं भौगोलिक विविधतालाई जोड्न रेडियो नेपालको भूमिका सराहनीय छ ।’

छलफलमा रेडियो नेपालका कार्यकारी निर्देशक बुद्धिबहादुर केसीले प्रदेश प्रमुख डा. अहिराजको सुझावमा आफूहरु सकारात्मक रहेको बताउँदै बर्दिबास प्रसारण केन्द्रबाट विभिन्न कार्यक्रममार्फत त्यहाँका विषय र मुद्दाहरू प्रसारण हुँदै आएको जानकारी दिए ।

कार्यकारी निर्देशक केसीले निकट भविष्यमा नै जनकपुरमा स्टुडियो सहितको एफएम निर्माणको तयारी भइरहेको समेत जानकारी गराए ।