मुम्बई–बलिउड अभिनेता अनुपम खेरकी पत्नी तथा भारतीय जनता पार्टीका सांसद किरण खेर हालका दिनमा क्यान्सरबाट गुज्रिरहेकी छन् । पत्नीलाई क्यान्सर भएपछि अनुपमले इमान्दारिताका साथ किरणको सेवा गरिरहेका छन् ।

दैनिक जागरणमा प्रकाशित समाचारअनुसार अनुपमले श्रीमतिको सेवाका लागि केही समयसम्म कुनै पनि प्रोजेक्टमा काम नगर्ने निर्णय लिएका छन् । यही निर्णयका कारण उनले एक हलिउड प्रोजेक्ट पनि छोडेका छन् ।

सन् २०१८ देखि अमेरिकन मेडिकल ड्रामा सिरिजमा अभिनय गर्दै आएका अनुपम सिरिजबाट बिदा भएका छन् । अमेरिकी टेलिभिजन च्यानल एनबीसीको सिरिज ‘न्यू एमस्टरडम’को तेस्रो सिजन चलिरहेको छ । यसमा अनुपमले डाक्टर विजय कपूरको भूमिका निर्वाह गरेका थिए ।

अनुपमले केही समय अघि सामाजिक सञ्जालमार्फत पत्नी किरणलाई मल्टीपल माएलो भएको जानकारी दिएका थिए । उनका अनुसार यो ब्लड क्यान्सरको एक प्रकार हो ।