मुम्बई– फिल्म ‘विक्रम वेधा’ बलिउडको बहुप्रतिक्षित प्रोजेक्टमध्ये एक हो । यही नामबाट तमिलमा बनेको फिल्ममा विजय सेतुपति र आर माधवनको अभिनय थियो ।

केही महिना अघि यो फिल्ममा आमिर खानले ग्याङस्टारको भूमिका निभाउने कुराले बलिउड गर्माएको थियो । तर अहिले आमिर यो प्रोजेक्टबाट बाहिरिएका छन् ।

दैनिक भास्करमा प्रकाशित समाचारअनुसार आमिरले स्क्रिप्टमा भएको केही परिवर्तनका कारण आफू बाहिरिने निर्णय लिएका हुन् । तर अहिले भने त्यो कारण स्क्रिप्ट नभई राजनीतिक कारण रहेको बुझिएको छ ।

आमिर यो फिल्मलाई एसियन दर्शकलाई ध्यानमा राखेर बनाउन चाहन्थे । पछिल्लो दशकमा चीन बलिउडका लागि सुनको खानी सरह नै बनेको छ । यहीकारण आमिर फिल्मको कथा चीनसँग सम्बन्धित होस् भन्ने चाहन्थे ।

तर दुर्भाग्यले कोभिड–१९ र भारत तथा चीनबीच भएको सीमा तनावलाई मध्यनजर गर्दै यो अवधारणा बदल्नुपर्ने अवस्था आयो । यहीकारण फिल्मको कथामा चीन राख्न समस्या भएपछि आमिरले फिल्मबाट हात झिकेका छन् ।

‘आमिर यो फिल्म हङकङ बेस्ड ग्याङस्टारमा आधारित होस् भन्ने चाहन्थे । उनले स्क्रिप्टमा पनि केही बद्लाव होस् भन्ने सल्लाह दिएका थिए । स्क्रिप्टलाई बद्ल्न सकेमा चीनबाट फिल्मले जबरदस्त कमाई गर्न सक्छ भन्ने ध्याउन्नमा आमिर थिए । तर यो बीचमा चीन र भारतबीचको सीमा तनावले आमिरको त्यो सपना पुरा हुन सकेन ।’, फिल्म निकट स्रोतले भनेको छ ।