दोहा– सर्वोच्च शिखर सगरमाथा आरोहणका लागि बहराइनका राजकुमारसहित १६ जनाको टोली सोमबार नेपाल प्रस्थान गरेको छ ।

आरोहण दलमा बहराइन रोयल गार्डमा कार्यरत १३ जना बहराइनी र ३ जना बेलायती नागरिक छन् । आरोही टोलीलाई विशेष विमानबाट नेपाल प्रस्थान गरेको बहराइनका लागि नेपाली राजदूत पदम सुन्दासले जानकारी दिए ।

आरोहणका लागि आवश्यक बन्दोबस्ती नेपालमा रहेको सेभेन समिट ट्रेक्सले मिलाएको बहराइनस्थित नेपाली दूतावासले जनाएको छ । उक्त टोली ८० दिनसम्म नेपालमा बस्ने दूतावासले जनाएको छ ।

टोलीले गोरखाको चुमनुब्बी गाउँपालिका एकस्थित समागाउँका बासिन्दाहरुलाई दुई हजार डोज कोरोना बिरुद्धको खोप पनि उपलब्ध गराउने दूतावासले जनाएको छ । टोलीलाई राजदूत सुन्दासलगायत दूतावास परिवारले विमानस्थलमै पुगेर सफल यात्राको शुभकामना दिएका छन् ।

यसअघि, गत असोजमा बहराइनका राजकुमार शेख मोहम्मद हमाद मोहम्मद अल खलिफाको सोही टोलीले आठ हजार एक ६३ मिटर अग्लो मनास्लु र छ हजार ११९ मिटर अग्लो लुबुचे हिमालको सफल आरोहण गरेको थियो ।