काठमाडौं– सत्तारुढ दल नेकपा एमालेका अध्यक्ष एवम् केपी शर्मा ओली र वरिष्ठ नेता माधवकुमार नेपाल पक्षका नेताहरुबीच बैठक शुरु भएको छ ।

बैठकमा प्रधानमन्त्री केपी शर्मा ओलीसहित उनी पक्षका महासचिव ईश्वर पोखरेल, सुवास नेम्वाङ, विष्णु पौडेल, प्रदीप ज्ञवाली लगायत सहभागी छन् । माधव नेपाल समूहतर्फ नेता नेपालसहित सुरेन्द्र पाण्डे, भीम रावल, घनश्याम भुसाल, रघुजी पन्त र गोकर्ण विष्ट सहभागी छन् ।

सर्वोच्च अदालतले नेकपा एमाले ब्युँताएपछि विवाद बढिरहेका बेला दुई पक्षबीच चार महिनापछि भेटवार्ता भएको हो । ओली र नेपालबीच गत कार्तिक २५ गते यता भेट भएको थिएन ।

ओली र नेपाल दुवै पक्षका नेताहरुले बैठकका लागि प्रयास गरिरहेका थिए ।  ओलीले नेपाललाई बैठकका लागि बालुवाटार बोलाए पनि नेपालले नमानेपछि धुम्बाराहीमा बैठक बसेको हो ।

प्रधानमन्त्री ओलीले फागुन २८ गते आफू निटक नेताहरुको केन्द्रीय कमिटी बैठक राखेर महासचिव बाहेक सबै नेताहरुको जिम्मेवारी खोसेका थिए । ओलीको यो कदमपछि एमालेभित्र विवाद चर्किएको थियो ।

माधव नेपाल समूहले आइतवार साँझ ११ जना स्थायी कमिटी सदस्यले वक्तव्य जारी गर्दै ओलीको कदमको विरोध जनाएका थिए । नेपाल पक्षले ओलीको निर्णयको प्रतिक्रियास्वरुप समानान्तर विभागहरु गठन गरेको छ ।

यता अध्यक्ष ओलीले चैत्र ७ गते केन्द्रीय कमिटीको बैठक बोलाएका छन् भने चैत्र ३ गतेलाई चियापान कार्यक्रम राखेका छन् । नेपाल पक्षले चैत्र ४ र ५ गतेलाई राष्ट्रिय भेला बोलाएको छ ।