काठमाडौं– प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा विभागिय टोली त्रिभुवन आर्मी क्लबले विजयी शुरुवात गरेको छ ।

शुक्रबार कीर्तिपुरस्थित त्रिभुवन विश्वविद्यालय क्रिकेट मैदानमा भएको खेलमा आर्मीले गण्डकी प्रदेशलाई ९७ रनले पराजित गरेको हो ।

आर्मीले दिएको २ सय ८८ रनको लक्ष्य पछ्याएको गण्डकी प्रदेशले मात्रै ४८ ओभरमा १ सय ९० रन बनाउन सक्यो ।

गण्डकीका लागि समीर कडेलले अर्धशतक प्रहमर गरे । उनले ९० बलमा ५ चौकाको मद्दतले ५० रन प्रहार गरेका हुन्। यस्तै गण्डकीका लागि अर्जुन कुमालले ३६ रन बनाए भने दिपक दुम्रेले २६ रन, विपिन खत्रीले ३९ रन बनाए।

गण्डकीलाई कम योगफलमा रोक्न राजेश पुलामि मगर र भिम सार्कीले उत्कृष्ट बलिङ गरे। जसमा राजेशले ४ विकेट लिए भने भिमले ३ विकेट लिए। यस्तै, आकाश चन्द र रोहित कुमार पौडेलले समान १/१ विकेट लिए।

यसअघि पहिलो ब्याटिङ गरेको आर्मीका लागि कप्तान विनोद भण्डारीले शतकिय इनिङ्स खेलेका थिए।
त्रिभुवन विश्वविद्यालय क्रिकेट मैदान (टियू) मा खुलेका कप्तान भण्डारीले अविजित रहँदै ७६ बलको मद्दतमा ५ छक्का र ९ चौका प्रहार गर्दै १सय११ रन बनाएका थिए।

उनको उक्त शतकिय इनिङ्सको मद्दतले आर्मीले गण्डकीलाई २सय ८८ को विशाल लक्ष्य प्रस्तुत गरेको थियो।
आर्मीका लोकेश बमले ४२ रन बनाएका थिए।

यस्तै आर्मीका राजु रिजालले ४५ रन बनाएका थिए भने राजेश पुलामि मगरले ३८ रन, भिम सार्कीले १५, हरिकृष्ण झाले १४ रन बनाएका थिए।

आर्मीविरुद्ध विपिन खत्री र विशाल पौडेलले समान २/२ विकेट लिए भने दिपेश खत्री र चन्द्रकान्त पौडेलले १/१ विकेट लिएका थिए । प्रतियोगिताको उद्घाटन आज बिहान युवा तथा खेलकुद मन्त्री दाबा लामा तामाङले बलिङ र राष्ट्रिय खेलकुद परिषद् (राखेप) सदस्य सचिव रमेश कुमार सिलवालले ब्याटिङ गर्दै गरेका थिए।