एक शिक्षण संस्थामा अन्तिम वर्षको परीक्षामा उच्चतम अङ्क ल्याउने आठ दश विद्यार्थीलाई देशका नाम चलेका औद्योगिक संस्थाले नियुक्त गर्ने परम्परा थियो । त्यो वर्ष पनि त्यही भयो ।

माथिल्लो नम्बर ल्याउने नौ जना उच्च पद र प्रतिष्ठायुक्त नोकरी पाएर दङ्ग परे । तर, उनीहरुमध्येकै एउटा केटाले त्यो अवसर पाएन, जो चुनिएका साथीहरुभन्दा कुनै कुरामा कम थिएन ।

ऊ असाध्यै परिश्रमी थियो । उसको सेवाबाट लाभ नै हुने ठानी एउटा उद्योगले अस्थायी रुपमा केही भत्ता दिने शर्तमा उसलाई काममा लगायो । तर आफ्नै साथीहरुको तुलनामा उसको नियुक्ति आर्थिक दृष्टिले कमजोर थियो ।

ऊ उदास हुन थाल्यो । सबैले उसको भाग्यलाई दोष दिए, तैपनि उसले हिम्मत हारेन । एउटा नामी औद्योगिक संस्थाले अचानक त्यस शिक्षण संस्थामा सम्पर्क गरेर जस्तो व्यक्ति माग गर्‍यो, त्यो ठ्याक्कै त्यही युवकसँग मिल्ने खालको थियो ।

उसले आफ्नो योग्यता अनुसारको काम र तलब पायो । फरक एउटै मात्र थियो, उसको नियुक्ति अन्य साथीको तुलनामा धेरै उच्चस्तरको थियो । तलब र सामाजिक प्रतिष्ठा, दुवै दृष्टिले ऊ सबै साथीभन्दा श्रेष्ठ हुन गयो ।

कहिलेकाहीँ अनुकूल समयको लागि प्रतीक्षा गर्नुपर्छ ।

साभार : ‘विश्वका उत्कृष्ट प्रेरक प्रसङ्ग’ पुस्तकबाट