काठमाडौँ– सत्तारुढ नेकपा एमालेको विवाद मिलाउन सिंहदरबारमा अहिले पार्टीका शीर्ष नेताहरुबीच छलफल शुरू भएको छ ।

पार्टीभित्रको विवाद मिलाउन नेकपा एमालेका अध्यक्ष तथा प्रधानमन्त्री केपी शर्मा ओली र वरिष्ठ नेता माधवकुमार नेपाल पक्षबीच छलफल शुरू भएको हो ।

सिंहदरबारस्थित प्रधानमन्त्री तथा मन्त्रिपरिषद्‍को कार्यालयमा शुरू भएको छलफलमा एमालेका ओली र नेपाल दुवै पक्षका दोस्रो तहका नेताहरूको सहभागिता रहेको छ ।

छलफलमा ओली पक्षबाट ओलीसहित नेता ईश्वर पोखरेल, विष्णु पौडेल, सुवास नेम्वाङ र रामबहादुर थापा बादल छन् । त्यसैगरी नेपाल पक्षबाट माधव नेपालसहित भीम रावल, सुरेन्द्र पाण्डे, गोकर्ण विष्ट, रघुजी पन्त सहभागी छन् ।

शुक्रबार भएको ‘वान टू वान’ वार्तामा २०७५ जेठ २ कै वरिपरि एमाले रहने गरी सहमति खोज्ने र त्यसका लागि कार्यदल बनाउने सहमति भएको थियो । त्यहि सहमतिलाई कार्यान्वयन तहमा पुर्‍याउन दोस्रो तहकासहित नेताहरू छलफलमा जुटेका हुन् । हिजो बूढानीलकण्ठस्थित व्यवसायी क्याप्टेन रामेश्वर थापाको निवासमा ओली र नेपालबीच झन्डै चार घन्टा वार्ता भएको थियो । त्यसअघि, ओलीले नेता नेपालसहित चार नेतालाई कारबाही स्वरुप पार्टी सदस्यबाट गरिएको निलम्बन फुकुवा गरेका थिए ।