मुम्बई– आध्यात्मिक गुरुका रुपमा विश्वभर प्रख्यात श्री श्री रविशंकरको बायोपिक फिल्म निर्माण हुने भएको छ । रविशंकरको शुक्रबार परेको जन्मदिनको अवसर पारेर फिल्म निर्माणको घोषणा गरिएको हो ।

एबीपीलाइभका अनुसार फिल्मको नाम ‘फ्री–द अनटोल्ड स्टोरी अफ गुरुदेव श्री श्री रविशंकर’ राखिएको छ । फिल्मलाई भव्य रुपले बनाउने तयारी तिब्र गतिमा गरिएको छ ।

फिल्म विश्वका १ सय ५० देशमा २१ भाषामा रिलिज हुनेछ । फिल्ममा कसले रविशंकरको भूमिका निर्वाह गर्नेछन् भन्ने बारे केही खुलाइएको छैन ।

फिल्मले रविशंकरको सुरुवाती जीवनलाई समेट्नेछ । फिल्ममा रविशंकर आध्यात्मिक गुरु बनेको र आफ्नो आध्यात्मिक कार्यबाट विश्वभरका मानिसलाई प्रभावित पार्ने कथालाई प्राथमिकता दिइनेछ ।

फिल्मको निर्माण महावीर जैनको कम्पनी सनडायल इन्टरटेनमेन्ट र लाइका ग्रुपले संयुक्त रुपमा गर्नेछन् । फिल्मको निर्देशन मान्टु बस्सीले गर्नेछन् । मान्टुले नै फिल्मको कथा लेखेका हुन् ।

फिल्मको छायांकन कोभिडको लकडाउन खुलेपछि हुनेछ । त्यो समयसम्म फिल्म निर्माणले अन्य प्राविधिक तयारी गर्नेछ ।