काठमाडौँ– प्रदेश २ प्रमुख डा. राजेश अहिराज प्रबल जनसेवाश्री चतुर्थ श्रेणी मानपदवीबाट सम्मानित भएका छन् । राष्ट्रपति भवन शीतल निवासमा आयोजित समारोहमा प्रदेश प्रमुख अहिराज सो मानपदवीबाट सम्मानित भएका हुन् ।

राष्ट्रपति विद्यादेवी भण्डारीले प्रदेश प्रमुख अहिराजसहित राष्ट्रका विभिन्न क्षेत्रमा योगदान पुर्‍याएकाहरुलाई आज विभिन्न मानपदवी, अलङ्कार र पदकबाट सुशोभन गरेकी हुन् ।

प्रदेश प्रमुख अहिराजले यसअघि पनि राष्ट्रपति भण्डारीबाट सम्मान र पदवी ग्रहण गरिसकेका छन् ।

गत चैत २७ गते वितरण गर्न बाँकी रहेकाहरुलाई आज पदक प्रदान गरिएको हो । नेपालको संविधानको धारा २७७ को उपधारा १ बमोजिम मन्त्रिपरिषद्को सिफारिसमा विभूषण प्रदान गरिँदै आएको छ ।

वि.सं २०७७ असोज ३ गते राष्ट्रिय दिवस तथा संविधान दिवसका अवसरमा उक्त वर्षको विभूषण घोषणा गरिएको थियो ।