काठमाडौं– यही वैशाख २३ गतेदेखि २७ गतेसम्म काठमाडौंमा आयोजना हुन लागेको ‘नेपाल अन्तर्राष्ट्रिय चलचित्र महोत्सव (निफ) २०२१’मा तीन नेपाली फिल्म प्रतिष्पर्धी हुने भएका छन् ।

नेपाल चलचित्र तथा सांस्कृतिक प्रतिष्ठानका अध्यक्ष केपी पाठकका अनुसार नेपाली फिल्म ‘लाटो कोसेरो’, ‘सरिता ११ वर्ष’ र ‘आमा खान्डो’ प्रतिष्पर्धी छन् ।

आयोजकले महोत्सवका लागि विश्वका विभिन्न ५२ देशबाट ४ सय ५० फिल्म प्राप्त भएको जनाएको छ । महोत्सवको आन्तरिक छनोट समितिले दिएको नम्बरको आधारमा उच्च नम्बर पाउने फिल्ममध्येबाट ३१ देशका ६३ फिल्म महोत्सवको प्रतिष्पर्धीका रुपमा यसअघि नै छनोट भइसकेका छन् ।

नेपाली प्रतिस्पर्धाअन्तर्गत फिचर फिल्म छनोट गर्न बाँकी रहेका फिल्ममा तीन फिल्म छनोटमा परेपछि अब निफमा ६६ फिल्म देखाइनेछन् ।

यी तीन फिल्ममध्येबाट एक उत्कृष्ट फिल्मले नेपाली फिचर फिल्म प्रतिस्पर्धाअन्तर्गत एक लाख नगदसहितको ट्रफी, उत्कृष्ट निर्देशक, लेखक, छायाकार, अभिनेता र अभिनेत्री ट्रफी पाउने छन ।

‘विश्वका कथाहरुको उत्सव’ भन्ने नाराका साथ ‘फिल्म संस्कृति’को विकास गर्ने उद्देश्यसहित सुरु भएको फेस्टिभलमा यो वर्ष महामारीको विषयमा बनेका फिल्मलाई अलग्गै विधामा प्रतिस्पर्धा गराई अवार्ड पनि वितरण गरिने आयोजकको भनाई छ ।

कोभिड–१९ ले पारेको प्रभावमा बनेका यस्ता फिल्मले ५ सय अमेरिकी डलर तथा ट्रफी प्राप्त गर्नेछन् । अन्तर्राष्ट्रिय प्रतिष्पर्धा अन्तर्गत सर्वोत्कृष्ट फिचर फिल्मलाई १५ सय अमेरिकी डलर राशिसहित गौतम बुद्ध अवार्ड प्रदान गरिने छ ।

यसैगरी, सर्वोत्कृष्ट वृत्तचित्रलाई १ हजार डलर राशीको माउन्ट एभरेष्ट अर्वाड, सर्वोत्कृष्ट एनिमेटेड फिल्मलाई ७५० डलरको मञ्जुश्री अवार्ड, सर्वोत्कृष्ट लघु फिल्मलाई ५ सय डलर राशीको वाग्मती अवार्ड यथावत रुपमा प्रदान गरिनेछ ।