काठमाडौँ– भारतीय राष्ट्रिय सुरक्षा सल्लाहाकार अजित डोभालले नागरिक समाज युद्धको नयाँ मोर्चा भएको बताएका छन् ।

भारतको हैदरावादस्थित सरदार वल्लवभाइ पटेल पुलिस एकेडेमीमा नेपाल, भारतलगायतका तालिमे प्रहरी अधिकृतको तालिम समापन समारोहलाई सम्बोधन गर्दै डोभालले नागरिक समाजलाई युद्धको मोर्चा भएको बताएका हुन् । उनले नागरिक समाज चोथो पीढिको युद्धको मोर्चा भएको बताए । उनले नागरिक समाजलाई नयाँ युद्धको मोर्चा भन्दै यसले राष्ट्रिय हितमा ठूलो क्षति गर्न सक्ने बताए ।

उनले सैन्य युद्ध निकै महँगो र धान्न नसकिने हुने भन्दै त्यसको प्रतिफल पनि निश्चित नभएको बताए । तर नागरिक समाजले देशमा विखण्डन, हिंसा ल्याएर ठूलो क्षति गर्न सक्ने उल्लेख गरे ।

उनले तालिम सकेका प्रहरी अधिकारीहरुलाई देशलाई यस्ता सुरक्षा चुनौतिहरुसँग पनि चनाखो हुनुपर्ने सुझाव दिए ।

उनले देशमा कानून व्यवस्था सुदृढ नभएसम्म सुरक्षाको अनुभूति नहुनेसमेत बताए ।

डोभालले यसो भनिरहँदा नेपाल प्रहरीका महानिरीक्षक शैलेश थापा पनि सो कार्यक्रममा सहभागी थिए । सो एकेडेमीमा नेपालका पाँचजना प्रहरी निरीक्षकले तालिम लिएर दीक्षित भएका छन् । स्क्रोल डट इनको सहयोगमा