काठमाडौँ– राजेन्द्र राई प्रदेश १ प्रदेशसभा नेकपा (एकीकृत समाजवादी) को संसदीय दलको नेता चयन भएका छन् । उनी सर्वसम्मत दलको नेता चयन भएका हुन् । नेकपा एमाले विभाजनपछि बनेको नेकपा (एस)को सोमबार बसेको संसदीय दलको बैठकले राईलाई नेता चयन गरेको हो ।

राई नेता चयन भएसँगै नेकपा (एस)ले भीम आचार्य नेतृत्वको सरकारलाई समर्थन नगर्ने निर्णयसमेत गरेको छ । नेकपा (एस)ले आचार्य सरकारलाई समर्थन नरहेको पत्र सोमबारै प्रदेश प्रमुखलाई बुझाउने भएको छ ।

नेकपा एसले समर्थन नगरेपछि आचार्य सरकार अल्पमतमा परेको छ । ९३ सदस्यीय प्रदेशसभामा हाल ९२ सदस्यीय कायम छ। एमालेका ५१ सदस्य रहेकोमा १० जना नेकपा (एस)मा गएपछि उसँग अब ४१ सदस्यमात्र छन् । त्यसमध्ये पनि एकजना सभामुख र एकजना निलम्बनमा रहेकाले मतदान गर्न पाउने एमाले सांसदको संख्या ३९ मात्र छ ।

प्रदेश सभामा कांग्रेसको २१, माओवादी केन्द्रको १५ र जनता समाजवादीको ३ सिट छ । केन्द्रमा बनेको सत्ता गठबन्धन प्रदेशमा बने आचार्य सरकार विस्थापित हुने देखिएको छ । यो गठबन्धनसँग ४९ सिट पुगेको छ ।