काठमाडौं– वि.सं. १९८४ मा नेपाली आधुनिक गीतकी प्रथम गायिका मेलवादेवी गुरुङले रेकर्ड गराएको गीत ‘सवारी मेरो रेलैमा’को रिमेक भर्सन सार्वजनिक भएको छ । यो गीत मेलवादेवीले भारतको कोलकातास्थित हिज मास्टर भ्वाइस कम्पनीमा रेकर्ड गराएकी थिइन् ।

मेलवादेवी आफैंले लेखेको यो गीतमा उनकै संगीत थियो । रिमेक भर्सनको गीतमा सविन सुवेदी र बेनिशा पौडेलको स्वर छ । काठमाडौंको अनामनगरमा रहेको म्युजिक किचेनले यो गीत पुन रेकर्ड गराएको हो ।

स्टुडियोका एरेञ्जर राजेन्द्र बजगाईंले यो गीत सुन्नको लागि आफु खोज्दा सहज रुपमा नपाएपछि नेपालको पहिलो यो गीत सबैले सहजै रुपमा सुन्न पाउन भनेर पुरानै भावमा रेकर्ड गराएको बताए । गीतमा राजेन्द्रकै संगीत संयोजन र मनोज परियारको मिक्सिङ छ ।

मेलवादेबी प्रति समर्पण गरिएको यो गीतको भिडियो बनाएर राजेन्द्र बजगाईंकै अफिसियल च्यानलबाट रिलिज गरिएको छ । भिडियोलाई केशब राज भट्टले तयार गरेका हुन् । जसमा गोविन्द अन्जानको छायांकन र राजेशकुमारको सम्पादन छ । भिडियोमा सविन र बेनिशा नै फिचर्ड छन् ।