काठमाडौँ– लागुऔषध र हतियारसहित प्रहरीले मोरङबाट तीन जनालाई पक्राउ गरेको छ ।

प्रहरीका अनुसार पक्राउ पर्नेमा सुनवर्षी गाउँपालिका–८ का ६० वर्षीय अब्बास मिया, चेवन कुमार धमला, बिशाल भन्ने खेम भट्टराई रहेका छन्।

जिल्ला प्रहरी कार्यालय मोरङका डीएसपी मानबहादुर राइका अनुसार अब्बास मियाको घरमा पेस्तोल, त्यसको गोली र लागुऔषध समेत फेला परेको थियो ।

उनीहरूलाई प्रहरीले बिहीबार पक्राउ गरेको हो । बुधबार बिहान बेलबारी नगरपालिका १० भाउन्ने जंगलस्थित पूर्वपश्चिम लोक मार्गमा धमला र भट्टराई सवार मोटरसाइकलले पैदल यात्रीलाई ठक्कर दिँदा ५ जना घाइते भएका थिए ।

घाइते मध्ये सुन्दरहरैचा नगरपालिका ९ का चेवन कुमार धमला र बिशाल भन्ने खेम भट्टराईलाई ईलाका प्रहरी कार्यालय बेलबारीबाट खटिएको प्रहरी टोलीले शंकास्पद देखेर चेकजाँच गर्ने क्रममा लागु औषध ८९२ पिस नाईट्रोजन ट्याब्लेट र १३.८६० ग्राम चरेश जस्तो देखिने कालो पदार्थ फेला पारेको थियो।

अनुसन्धानको क्रममा त्यो लागुऔषध अब्बास मियाबाट किनेको उनीहरूले बताएका थिए। त्यसपछि प्रहरीले मियाको घरमा खानतलासी गर्दा प्रहरीले एउटा कटुवा पेस्तोल, २ थान गोली, नाईट्रोभेट ६०० ट्याब्लेट, डाईलेक्स डिसी २ बोतल र एउटा चक्कु फेला पारेको थियो।

यो विषयमा अहिले प्रहरीले थप अनुसन्धान गरिरहेको बताएको छ ।